Remu(u)nj

V'r hove neet sjoew te zeen det de Irakeze Limburg bènnevalle. Es euveral de nuuj plaatsjname van Veldeke sjtaon, vènje die toch hunne waeg neet.

Gelètterde en geleerde luuj van Veldeke höbbe vasgelag wie de Limburgse dörper en gemeindes veurtaan in ein 'weitesjappelik verantjwoorde' sjpelling mote opgesjreve waere. Ich moot hie neet meer Zitterd mer Zittert sjrieve, want in de weitesjappelike Zittesje sjpelling is het Zittert mit ein 'T' op het énj. Dao is good euver naogedach en es me good loestert nao eine richtige Zitterder, eine minsj dae bènne de wal gebaore is, dan heurt me dudelik ein 'T' aan het énj van het waord. 't Is ein kwestie van nuance en good doordènke. Marot wurt ouch mit ein T gesjreve, vastelaovend mit ein D, en optoch zónger T. Es me dao good euver naodènk is het logisch det Zittert mit ein T gesjreve wurt. Zittert mit drie T's is ouch sjoonder, mer de nuuj sjpelling woort veural goodgekäörd ómdet de D van het sjriefmesjien van de sjpellingkemissie kepot waor en me neet kós wachte pès det einen experd, einen teskuntige of einen dechnieker det mesjien kaom reparere.

Waat deis te es dien sjriefmesjien kepot is? Vloke en Franse wäörd gebroeke wie nóndedju en nóndetónnaer. En zo óntdèkte de sjpellingskemissie op häör sjriefmesjien ei gans sjpassig teike, det veer normaal neet gebroeke: het Franse 'accent circonflexe', de '^', het kepke. Het is ei teike det is oetgevónje óm de luuj te koejenere, want es te ein lètter mit ei kepke moos make, moos te twee kere op het klavier houwe. Het haet wiejer gein beteikenis, mer de sjpellingkemissie vónj het sjoon. Dus woort het Einikhoêze en de Kloês. Es g'r die weurd oetsjpraek dan kónt g'r det kepke dudelik heure en luuj die 'crêpe' ónger hun sjoon höbbe zulle de sjpellingskemissie hónderd persent geliek gaeve. Zo klink det, wie die zaole.

Noe de sjpellingslkemmissie de luuj toch al mit vraem teikes aan 't laammake waor, begós ze ouch de 'e' mit ein trema sjoon te vènje. Oirsbeek woort Oeësjbik, Heerlen woort Heële, Weert woort Wieërt. Het is de bedoeling det me det lank oetsjprik. Vlak veur die 'ë' moot me sjtoppe, aom haole en dan wiejer gaon. Mer ouch weer neet te lank trèkke want dan meine de luuj det Haelder en Wiert in Mestreech likge. En det is gein sjpelling mer ein affrónt.

Wie dölder gebroewe wie baeter beer. Kaum houw Veldeke häör weitesjappelike lies aan dippetee Eûërlings gegaeve, of dao versjeen al het eerste weitesjappelik verantjwoorde plaatsjnaambraet in de provincie. En neet op de minste plaatsj: in Remunj, de kirkelike hoofsjtad van Limburg, het Mekka van wo-oet Veldeke häör dialektmèsse organiseert. Aan de Kölsebaan sjteit saer 15 februari ei blauw braet 'Roermond/Remunj'. Roermond in 't groot en Remunj in 't klein. De Hollenjers maoge doorvare nao Roermond en de Limburgers mote oetsjtappe óm te kieke of ze nog op de richtige waeg zitte.

Sjoon plakkaat, Limburg is eindelik tweetalig. Mer... volges de offisjeel lies van Veldeke en de provincie moot het 'Remuunj' zeen, mit twee u's. De sjilder van Remuunj haet ein 'u' vergaete.

't Begint weer good. Het eerste braet mit de offisjeel Limburgse sjpelling en d'r sjteit al ein sjpelfout op zo groot wie ein koo.

Stjtreektaalfunctionaris Pierre Bakkes, dae ouch in die sjpellingskemissie zit, woont in Remunj en kump noe ederen daag het braet mit einen aansjlaag op zien misjonariswirk taenge.

't Is mit die sjpelling wie mit negerkes duipe in Afrika. Kóns wilje toch neet bekere...

prikken@limburghuis.nl