Waor of neet waor aflevering 625

vrijdag 17 oktober 2003

Paul Prikken

[A = FOUT]

Ja, es de witte hin op het daak zit: dao bès te vèt mit! Höbs te ein sjoon hin die altied van die sjoon witte eijer gelag haet, en dan zit ze op het daak. Kóns er neet meer aan en eijer kriegs te ouch al neet.

De witte hin zit op het daak beteikent dus: de voorspoed is veurbie, het is gedaon mit gemaekelik geldj verdene, dao kump eine sjlechten tied.

Wie noe mit de regering Balkenende: de witte hin zit op het daak.

[B = GOED]

Bie mich maog de witte hin gerös op het daak zitte. Het beteikent namentlik: ze zeen pas getrouwd, het zeen dao wittebroodswaeke, het zeen dao Flitterwochen, wie de Pruus det zaet.

Noe hange ze dan ei bördje: niet storen - do not disturb aan de deur. Mer vreuger zatte ze ein witte hin op het daak. Ederein wós dan: val ze neet lestig, ze zeen pas getrouwd.

[C = FOUT]

Baeter ein witte hin op het daak es ein zjwarte kreij. Es de witte hin op het daak zit vilt alles mit, alles geit veur de wèndj, het löp dao allemaol op raedjes, het loopt van een leien dakje, wie den Hollenjer zaet.

Det beteikent het dus: voorspoed, welvaart, gelök.

[OPLOSSING = B]