Waor of neet waor aflevering 579

donderdag 14 augustus 2003

Paul Prikken

[A = GOED]

Ei modern waord. G'r kènt die oetsjprake van de politici in dit landj det asielzeukers hie 'doedgeknuffeld' waere, ze waere teväöl in de watten gelag, ze waere teväöl verwènd, ze waere teväöl vertroeteld. In het Limburgs zouw ich zèkge: ze waere doedgekernóffeld. Want kernóffele beteikent: knuffelen, koesteren, vertroetelen.

[B = FOUT]

Waat haet Prins Bernhard in zien knoupsgaat? Ein anjer, ein kernóffel. En woveur haet hae ein kernóffel in zien knoupsgaat? Óm te kernóffele! Waat beteikent dus kernóffele? De sjtaaste kael oethange, dich opdirken, dich versjoendere, dien kleijing versere óm op te valle.

[C = FOUT]

Ich moot hiet toch heimelik lache mit daen oetlèk van uch. Ich kernóffel, ich laot det neet blieke mer ich lach stiekem, ik lach in mijn vuistje, wie den Hollenjer det zaet.

En det beteikent kernóffele: heimelik lache, stiekem lache, achter de rök van emes plezeer höbbe in de sjtómmiteite die angere verkondige.

[OPLOSSING = A]