Waor of neet waor
dinsdag 08 januari 2002
Auteur: Wim Kuipers - wim.kuipers@hetnet.nl - tel. 043-325.23.22.

[A. FOUT]
Wen ich dit waord taalkundig oet mót milke, kóm ich rap in 't Aod-Ingels oet. Meh wiet geer wit: det is dök van hie-oet mitgenaome. Geer dach toch neet det die Ingelse doe al wäörd oet Amerika hauwe?
Keume: eine variant van kaoje of in 't Nederlands kaantjes: oetgebakke sjtökskes sjpek. In Remunj heite die dinger krabbe of krebkes, meh geer meug aevenzoegood A. keze - dan wint geer.

[B. FOUT]
Sjoen gevónje. Meh wie kumps doe aan die M? De M van 't waord kom, vdet bie ós meis kómp geneump wurt. Den dao haet det waord mit te make. Het is waal ei wirkwaord: keume, en het kump oet de laerloejerie. Keume - det is de veller, de huiden, van de ein kómp in de anger doon. In Mesjtreech haet me nag ei terrein det De Koompe hit, taengeneuver de kazerne. Me zaet det det gebeed zoe hit umdet het dao get leger is. Kwatsj: det kump van die laerkómpe. Die loge dao, vlakbie de Jeker, den die sjtónke zoe. Me hauw die lever neet in de sjtad.

[C. GOED]
Waat kal - is 't vandaag neet Enneuzel Kienjer? Det mirkste hie waal. Höbs doe kómpeman oets ins in ein kómp beer gehad?
B. Kómp?
C. Zeker - vreuger haolde me beer in ein saort kómp, of eine kopere kaetel, wo me noe blome in haet, mit eine ingel aan: hengsel. En wen det beer ei paar daag sjting, dan keme dao keume op. Drievende plekskes sjummel eigelik, wie me det noe nag kan zeen op appelsap det te lang sjteit, meh minder sjummelig. De luuj drónke det geweun op.

[OPLOSSING = C]
Opmerking, zeker wen eine A. geraoje haet. Dae menier dae A. dach, wen dae aan kaantjes gedach haet, woor hae mesjiens in de wór mit kaam: det is 't Nederlandjs veur keume, en v. Dale zaet - ich laes veur: kaam - wit, gerimpeld of vlokkig vlies op wijn, bier enz., gevormd door een spruit- of gistzwam. Proost, det veer det nag lang meuge löste.