Waor of neet waor aflevering 321
woensdag 07 augustus 2002
Paul Prikken

[A = FOUT]

Sjnirke det is de verkleinenden trap van sjnurke. 't Is hetzelfde es sjnurke, mer het meuk minder laweit. Dames die mit eine sjnurker getrouwd zeen kónne dao-euver mitkalle. Eine sjnurker dae deit van die lang, depe, brómmende sjnurke. Mer eine sjnirker dae deit van die korte sjnirke, zoe twee drie, en dan hilt hae efkes den aojem in en begint euvernuuts. Det is sjnirke, lich sjnurke.

[B = FOUT]

't Zeen neet allein de mansluuj die sjnurke. Vrouluuj sjnurke ouch. Mer dao zeen gein statistieke van. Want eine kael dörf natuurlik neet taenge zien vrouw te zèkge det hae nog anger vrouluuj kènt die ouch sjnurke. Want dan vreug die: woe wèts doe det van? En dan sjteis te dao, probeer det mer ins oet te lèkge!

Mer sjnirke det beteikent toch gans get angers. Sjnirke is hetzelfde es sjoere, vrieve. Bieveurbeeld: ein deur die sjnirk, die taenge de vloer sjoert es te ze aopedeis.

[B = FOUT]

Veurige maondj nao den Tour de France gekieke? Kiek, es die renners mit 80, 90 killemaeter per oer de berg aafgaon dan beginne hun remblökskes te sjnirke. Sjnirke beteikent dus schroeien, zengen, verbrenne. Of es te ei sjtriekiezer te lang op ein humme lees sjtaon, dan begint det de sjnirke.

[OPLOSSING = C ]