Waor of neet waor
vrijdag 28 december 2001
Auteur: Wim Kuipers - wim.kuipers@hetnet.nl - tel. 043-325.23.22.

[A. FOUT]
Knaokedaag: det is gans dudelik, det is maondig, de lèsten daag van 't jaor.
't Jaor wurt waal oetgebeeld es eine aoje miens, vel euver knaok - dao zól det vandan kómme. Paters höbbe - veur de verklaoring - ouch waal gedach aan d'n alder- alderlèsten daag oets, sjtrakkes in het jaor hóngerddoezjend zoeváöl, veur de opstanding der doden, dan mótte alle knäök biejeingezóch waere, van waem die zien.

[B. GOED]
Ich kan het neet mit dich ins zien.

A. Nae - wen det zoe woor, tracteerde ich drei daag op champagne.

B. Kiek - d'n 31ste is dit jaor maondig, en de knaokedaag is de goonsdig (of hie en dao dónderdig, wurt gezag), in jeder geval d'n daag det me de waek góng deile, en det woor: nao maedje of verloofde gaon. Det meugde neet op alle daag.

[C. FOUT]
Waat haet det mit eine knaok te make - vrieje? Nae - knaokedaag is óngeveer waat Hollenjers restjesdag neume, kletskesdaag. Aete waat nag euver is, waat nag aan de knaok van de vurge daag zit. Vreuger mós me det oet ermooj doon. Ich lierde ei leedje:

Salentien haet sóp gekaok,
veerteen daag van eine knaok.
Zoe erm wore de luuj doe - dao meuge veer nag waal ins euver naodinke, in dees daag van bezinning.

B. Amen.

[OPLOSSING = B]
B. woor good. Meh wo kump det waord vandan? Meugde me daen daag aan de knaok zitte, mer estebleef neet aan 't vleisj?, is waal gezag.