Waor of neet waor
donderdag 27 december 2001
Auteur: Wim Kuipers - wim.kuipers@hetnet.nl - tel. 043-325.23.22.

[A. FOUT]
Det is waal hiel maekelik. Pin en puntj zien dökker dezelfde wäörd. Neet bie 't kaarte of mit de windjbuks sjete, meh waal wen 't letterlik is: eine pin aan get, wurt ouch waal puntj geneump. En de beteikenis van op 't pinke sjtaon is: klaor um te beginne - verlangend eigelik. Hae sjteit op 't pinke zich eine BMW 1000 te koupe.

[B. FOUT]
BMW 1000 - wenste wós waat die oetdrökking wörkelik beteikentj, deejste zoen kal neet. Woveur höbste neet gezag: baove op de pin van de korsboum sjtaon - det is ouch kwatsj.

Nae: eine dae op 't pinke sjteit is doedkrank - dae maak 't meis neet lang mie. Sjoen oetdrökking ondanks dae elenj. Ze kump van valle veur dere, wie ein ratteval of ouch veur veugel. De sjlaag, de val van die valle woorte gesjpanne mit ein vaer o, en ei pinke hool de vaer vas. Trooj of sjteet noe ein rat get hel op det pinke, paaf - dao woor ze d'r gewaes, of ze joenkerde ein oer in de windj.

[C. GOED]
Kal kal kal. Ich weit neet of eine det biegehaoje haet, wie dök ich geliek hauw. Missjiens minder es die angere. Det kump umdet ich op de ierste plaats historicus bön, geine taalkundige oet de sjool van Nónk Harie. Meh det kump mich huuj good van pas. Die oetdrökking is van wied veur d'n aorlog, en mótte veer letterlik numme. Ze beteikent: achter op eine fits sjtaon. Woveur zól me hie angesj sjtaon gebroeke?

[OPLOSSING = C]
Toelichting.
't Pinke woor ein sjtevige sjroef es verlinging van de achteras van eine fits, meh allein aan de linkerkantj. Dao kós me op gaon sjtaon, wen me mit wól mit eine dae eine fits hauw, en doe neet. Me sjting mit de linkervoot op det pinke, en 't rechterbein waerde op 't sjpatbord gelag. Fitse hauwe doe nag gei sjteulke um op te zitte - de officiële bagagedrager.
Meh det pinke waerde ouch gebroek um op te sjtappe. Me zat dao de linkervoor op, PEDDE mit d'n angere voot ei paar maeter, en zjwejde dan 't rechterbein euver 't achtersjpatbord haer. Ouch fitse mós me liere.