Waor of neet waor
donderdag 25 10 2001
Auteur: Wim Kuipers - wim.kuipers@hetnet.nl - tel. 043-325.23.22.

Pluut

A. [FOUT]
Wie heite die luuj die dit verzinne: de taalmeisters? Die weite hiel get, meh dit is te gek. Nou ja: wen doezejend miense ei waord weite, is het gei sjpeelke mie. Pluut dus: det zien sjale, bolsters, meh allein wen ze diek zien, det is sjaejlik, dan zit d'r minder binne d'rin. Ich neum erte, wen die gein kans gekrege höbbe, wied te klein zien. Ich höb het mien oma dök heure zèkge, wen mie moder erte bie AH gekoch hauw: waat mót ich mit det grei, det is meis pluut: väöl sjaal, nieks d'rin.

B. [GOED]
Wen ich neet wis waat pluut is, den gluifde ich dae man. Dae geit deep in op oos taal. Helaas - meh ich höb het lestiger. Ich weit waal waat het is, meh wie verduutsj ich uch det. Kiek ins: wen die taalmeisters nao boum vroge, wie mót me det oetlikge? Eine sjtek mit eine greune kop? Pluut - det is ei mets - mer neet veur te aete, meh veur get door te sjnieje, touw of reme. Boere gebroekde det. En me kan d'r ouch eine mit sjtaeke, mer det deje ze op anger plaatsje.

C. [FOUT]
Sjiek waord. Kiek, ich es taalgelierde - det zien die angere neet, ich zeen drek waat veur saort waord det is. De kómbinatie p-l-u-u en dan eine mitklinker, kump in het Nederlandjs neet veur. Bie ós in ei paar wäörd, wie pluum en pluus. Naeve pluut sjteit in het Hollesj neet pluit - dus het is gei dink, ei mets of zoe. Het mót get angesj zien, en mich woor het sebiet dudelijk det det ein naobootsing van geluud is, van eine vogel, heur (hoge toon): PLUUT PLUUT PLUUT. Zoe reup de roodborsttapuit, dae bie ós - wie d'r nag neet weggesjpaote woor - tapluut hoot, mit ein L. Wie det deerke de Moerdijk euver vlaog, is d'r die L kwiet gewaore: Hollandj hauw al twie L's.

[OPLOSSING = B]