Waor of neet waor
vrijdag 23 november 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Eine taalkundige zuut sebiet det zoe waord op -EL get mit drejje te make haet. Krek wie koekerel - ein tol, of carrousel.

B. En hiemel dan?

A. Krek - hiel aod waord, en vreuger dachte de luuj det d'n hiemel drejde, neet de aerd.

C. Ich zèk kaerel - ouch op -EL. Dae drejt zeker róndj de vrouwluuj.

A. Inderdaad - doe begins het te liere. En ein lellebel drejt um de kaerels haer. Meh trök nao die tispel. Ich höb neet gezag det die zelf drejt, nae: det haet get mit drejje te make. 't Is namelik de pin wo-in ein deur drejt, en dan meis die dieke dinger wo-in ein sjuurpórt hingk en drejt.

B. [GOED]
Einen tispel: dao kan het dich waal ins van gaon drejje. En dan neet umdet eine pin van ein sjtaldeur aafgebraoke zól zien. Het waord tispel is ei tiedje weg gewaes, mer doe heurs het noe weer. In plaatsje wo de luuj gaer wille wone meh wo geine boewgróndj te koup is. Dan koupe luuj mit knabbe, mit sent zèkge ze in Mesjreech, die koupe zich einen aoje tispel, braeke dae ram aaf en beginne obbernuuj te boewe. Einen tispel is dus ei aod, gammel hoes - bao eine boewval.

C. [FOUT]
Mósse dem weer heure: rieke sjtinkers die zich einen aoje tispel koupe - det besjteit gaaroet neet. Doe kans neet EINE tispel koupe, en al hielemaol geine aoje. Ich daag dich oet. Gank ins de baan op en vraog: kan ich eine aoje, gebroekde tispel koupe? Böste euver ein hauf jaor nag neet trök, den tispel, det is eine sjoonreem - veter.

Wie ze op anger plaatsje riesjtartel zèkge - sjtartel - tispel: det zit in dezelfde sjoon.

[OPLOSSING = B]