Waor of neet waor (13)
Woensdag 23 05 2001
Auteur: Paul Prikken info@limburghuis.nl

Sjtraever

A. [FOUT]
De sjtraever det is de opstjapplank aan de bók van ein kar. Dae bók dae sjteit nogal hoeg en om gemaekelik op te sjtappe zit dao zo ei klein trepke van ei paar sjtravers die mit iezerkes aan de bòk vasgemaak zeen.

B. [GOED]
Dit is de darteende aaflevering van waor of neet waor in het nuut sezoen. Ein óngelöksgetal en ich bèn deze mörge mit miene kop taenge ein sjtraever geloupe. Eine sjtraever det is zo'n sjtiep of eine balk dae ze sjuins taenge ein auw moer zètte óm die te sjtiepe.

C. [FOUT]
Luuj die mit hunne kop örges taengeloupe weite neet waat ze zèkge. Eine sjtraever det is het Limburgs woord veur het Duutsj 'Streber'. Emes mit väöl ambisie. Veur eine sjtraever is het noots genóg. Dae wilt ummer mie.

[OPLOSSING = B]
Sjtraever is wie het Duutsj 'Strebe' ein sjtiep, ein sjoor, eine balk dae d'rveur zörg det get neet ómvilt. Het waord is ein aud waord oet het boewbedrief. Het waor ei bitje ein sjtrikvraog, want de 'streber' kump van dezelfde sjtam. Det gebroeke v'r ouch in het Limburgs mer den sjpraeke v'r het oet wie in het Nederlands of in het Duutsj: streber.