Waor of neet waor
donderdag 22 november 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Duutsverdèrver. Me heurt waal ins det zoeväöl sjoen wäörd verdwiene, weg wie vlege in de wintjer. Dit waord kan me ein eindaagsvleeg neume. Wie lang zól det besjtange höbbe - twie, drei jaor? Het is van lès van d'n aorlog, wie d'r get mie verzit woor taenge de Móffe - det hit: taenge Pruse sjeldaote dan. Dao zien d'r hiej get nao de baovewerreld gehólpe ofwaal: totaal verdorve, det beteikent eigelik: vermaord. Het Waordebook Nederlandse Taal zaet euver verderven: in de meest oorspronkelijke betekenis: den dood doen vinden, doen omkomen. Ger Bertholet - van 't vreugere Verdreet van Limburg, dae haet ei tonielsjtök gemaak euver ein fótsj, ein prostituée netjes gezag, die in Mestreech zeker éine móffesjeldaot in 't verdèrf geduujd haet - zèk mer um zeip gehólpe. Meh ouch luuj oet 't verzit woorte veurzichtig duutsverdèrvers geneump - dan wis me waat zie wólle. D'r zien hie en dao sjeldaote in de zeikkelder geduujd. Amen.

B. [FOUT]
Allei allei - doe mós d'n aorlog neet misbroeke um diene kwatsj kwiet te kónne. Duutsverdèrver is ein van de sjoenste wäörd die het guf. Det duutsj - det is op anger plaatsje knooj, drek, getuug, suig oftewaal: ónkroed - in 't Ingels weed. Wit geer waat hasj eigelik is.
Meh noe dien Pruse. Die zien hiej noets gaer gezeen. Het is dus logisch det in grensdörper drek duutsj geneump waerde. Veer kinne ouch: eine vieze ammie: Amerikaan. En waat in Naorwaege 't waord Deen beteikentj, det dörf ich hie neet te zèkge. Geer mót weite det Naorwaege drie ieuwe Deens gewaes is.

A. Kriege veer noe gesjiedenis? Möste bie C. zien.

B. Ich woor bao vaerdig. Duutsverdèrver, det is dus grei um dae knooj, ónkroed of ouch kaeverte weg te verdèrve. Boere hauwe dao dök eige middeltjes veur.

C. [GOED]
Mariejedeies - ich höb hiel get gelierd. Verderve, nutte Dene: A en B kómme ei bietje in de buurt. Duutsj - dames en hiere, det haet hie nieks mit de Pruse van doon, het sjteit veur 't Diets of: de taal van het volk - de eige taal, en neet Frans of Letien. En eine dae het neet nej nump mit zien taal, ich neum gein name meh went geer nae zoen neuge maondj Waor of neet waor aan de deskundige A en B mót dinke, ich sjpraek uch neet taenge, zoe eine, dae get aankloet mit de taal, det is eine duutsjverdèrver.

[OPLOSSING = C]
Went geer geine duutsverdèrver wilt waere, kiek dan ins get dökker op de website euver de Limburgse taal van de Wirkgróp AGL: www.limburghuis.nl.