Waor of neet waor
vrijdag 21 december 2001
Auteur: Wim Kuipers - wim.kuipers@hetnet.nl - tel. 043-325.23.22.

[A. FOUT]
Noe mót ich toch veurdet deskundige C weer mit zien taalkundige verklaoring kump dem veur zien. Loester loesteriers. Sjtapele, sjtevig, sjtaon, sjtöltes. Wiejer hoof ich nieks te zèkge: eine sjtöltes is eine sjtapel hout, dae vreuger epaart sjting, beveurbeeldj midde in d'n haof. Dus neet taenge ein moer gesjtapeld.

[B. FOUT]
Ich zeen dae sjtaon, dae sjtöltes van dich. En wen dae lekker hoeg woor en neet umveel, dan kós me dao sjtols op zien: trots. Dao kump det waord vandan. Sjtols is Nederlandjs trots, veer zèkge ouch greuts, en eine sjtöltes is dan eine kaerel dae meint det d'r geweldig is.

A. Zoeget wie d'r perfesser Pim?

B. Dao gaon ich neet euver, ich kan zie dunderbie aanwieze. Eine opsjöpper kan me ouch waal zèkge.

[C. GOED]
Waat eine kal. Ich zól bao dinke det 't waord sjtuntel is. Het is waal eine kaerel, wie B. zaet. Meh veur eine dae sjtols is, kan me nag waal ei bietje waardiering höbbe. Veur de waore sjtöltes neet, den det is eine sökkel, eine rare sies, mafkees, en zoe kan me wiejer gaon.

[OPLOSSING = C]
De taalmeisters wille nag kwiet det dit ei gans aod waord is, en det 't oet 't Letien kump, van stultus: dwaas, ónversjtenjig.