Waor of neet waor
dinsdag 18 december 2001
Auteur: Wim Kuipers - wim.kuipers@hetnet.nl - tel. 043-325.23.22.

[A. GOED]
Mariejedeies - ik gaon mich hie eine aoje eum veule. Wo höbbe ze dit waord weer vandan gehaold? Laote veer zèkge det veer 't nag EINE kier gebroeke, hie vandaag, op de randj van 2001 en dan noets mie, of geer mót - oei, noe mót ich oetkieke det ich gein medelanders te kakke zit. Ich zal veurzichtig zien: sjerkeukske kump bie ós kattelieke Limbo's neet mie veur, den het beteikent: 't lèste kiendj oet ein rie van minimaal ach of nege, meh meis twelf of nag meer.

[B. FOUT]
Enne - meinste noe detste ei klein buutje gemaak höbs? Gank ins nao wie dök dets doe geliek höbs - ich dink neet detste nao de zomer al aan ach of negen gekómme bös. En det keukske, waat is det? Hauwe die wichter eine kleinere moderkook? Sjerkeukske is eigelik - wie de luuj al gezeen höbbe sjerP-keukske, meh det sjprik zich neet good oet, en dan leut me ein lètter weg, wie me hie ouch lifkaoker zaet, aone T. Det sjerp keukske det sjmaakde sjerp, en det krege de paerd, dan wirkde die heller - of rende wie eine wilje. Me zag waal det 't van Franse riepaerd euvergenaome woor, en ouch waerde bewaerd, en ich dink det det zoe is, det dao ei versjerkend middel in zoot.

A. Doping?

B. Ja - of die luuj det hie neet wóste, allein in Amsterdam zeker. Loer ins in 't waordebook van Kirchrao, dao sjteit: haste kennef jehad, det is hennep, hasj, doe bies zoe sjtuurmiesj.

C. Klaor?

[C. FOUT]
Ich sjnap neet det geer es taalkundige allein aan ei keukske dink, koekje. 't Guf onnag keukske (langere EU), verkleinwaord van keuke, kiek in 't waordebook van Remunj.
Det is ein. Twie: det deil sjer. Pruses waordebook pakke, opzeuke Geschirr, waat sjteit dao: servies en vaatwerk. Det lèste mótte veer höbbe. Op boerderieje goof 't tösje de aetkeuke en de sjtelling ei kleiner hok wo de fuujtuite sjtinge en zuver gemaak waerde, de melkbussen. En ouch de groeter kaetele, wo veevoor in gekaok waerde, kerboet in gemaak. Det woord de sjerkeuke, voor 't sjier of Geschirr. Allewiel zól me zèkge - in zekehoezer beveurbeeldj: de sjpeulkeuke.

[OPLOSSING = A]
A hauw gans geliek. De taalmeisters teikene hiebie aan det det ei waord is veur ein teen en ei muulke van de juffrouw. De miense höbbe zich veurgesjtèld of veur zoen teende of elfde wich de moder zich nag get biejein mós sjerre, krek wie veur 't lèste keukske of waofel de alderlèste deig oet de kaetel gesjrab waerde.