Waor of neet waor
donderdag 15 11 2001
Auteur: Paul Prikken

Het heilig oug

A. [GOED]
Dat is de precies waat mien twee collega's deskundigen hie ummer doon: op het heilig oug wirke. Ze doon mer get, ze zèkge mer get, ze fantasere zich mer get. Ze wirke zónger euverlèk, ze bekieke het ins mit ei sjeif oug en dan gaon ze aan de geng. Es het volgens hun óngeveer zjus is, dan klatsje ze het d'roet. Deskundige B haet lèts ei muurke in zienen haof gemetseld. G'r moot ins gaon kieke! Zor sjeif es get, want van eine waterpas of ei sjeetloed haet dae nog noets geheurd. Ei sjendaal, mer ja dae zèt op het heilig oug get sjtein opein en meint det die moer later waal vanzelf rech zal greuje.

B. [FOUT]
Dat muurke höb ich dao gezat óm nuujsjerige luuj wie deskundige A boete te haute. Hae geit ummer euveral loere óm dao commentaar op te gaeve. Hae meint det hae det zo-mer óngesjtraof kèn doon, mer ich höb nuuts veur häöm: het heilig oug, het oug van God det zuut toch waat hae allemaol oetsjpook. Kènt g'r die nog: die ingliesde sjilderiekes die vreuger op väöl plaatsje baove de deur hinge: einen driehook mit dao-in ei groot oug. En dao-ónger sjtóng: God ziet u. Det waor ein waarsjuwing det Slevenheer toch weit haet van al det achterröks gedoons. Ich zouw zèkge taenge deskundige A: pas mer op veur het heilig oug. Slevenheer kump dich nog ins dien raekening prizzentere.

C. [FOUT]
Ja, noe moot ich toch weer trök in den tied van het Limburgs museum. Wèt g'r het nog wie het huuske, de WC boete sjtóng? In de deur van dae WC waor op kiekheugde ummer ei gaetje oetgezaeg, sóms in de vorm van ein hertje, sóms ouch mer in de vòrm van ein sjpleet. Det waor het heilig oug. Het deende óm get leech van boete nao bènne te laote en waarsjienlik ouch óm get sjtank bènne nao boete. Sjoon oetvènjing, want er zeen neet väöl dènger die tegeliekertied in de twie richtinge wirke. Det waor dus het heilig oug. En ja, es deskundige B meint det Slevenheer dich tot op de WC achtervolgt, dan is dat zien zaak. Ich dènk dat dae toch get angers te doon hauw es euveral mit eine wesjknieper op zien naas door het heilig oug te gaon loere.

[OPLOSSING = A]