Waor of neet waor
vrijdag 14 december 2001
Auteur: Wim Kuipers - wim.kuipers@hetnet.nl - tel. 043-325.23.22.

[A. FOUT]
Allei - des veur vastelaovesluuj waal hiel gemaekelik. Die kinne 't leedje joetse jatse, poetse en fratse, ich weit het neet mie gans, meh joetse - of meis: sjoetse, sjoeje ouch - mie kan ich dao neet van make. Ingels to shoot is neet allein sjete, meh ouch uitsjete, oetloupe wie van buim in 't vreugjaor. Hetzelfde. Dus: ein sjoet is ei vrouwmes det de gansen daag op jats is, oetlöp zoegezag. In Tegele zèkge ze ouch waal ein loupsjans.

[B. FOUT]
Ich mót biegaeve: doe kóns good Ingels kalle, baeter wie ich, meh van de Ingelse taalkunde höbste min versjtandj. Ein Ingelse OO is in 't Limburgs bao noets ein OE. Loester: book - book, foot-voot, cookie-kook. Meh doe hauws waal weer get geheurd. Doe mós kieke nao 't Ingelse shout: sjreve, sjreve wie ein sjoet: eine kalkoen, en meis 't menke: de kalkoense haan. Dus zeker gein vrouw. Höbste dem waal ins bezig geheurd? Det deer sjting ouch op die flesj whisky van de reklaam: the famous shout.

[C. GOED]
Die twie mooste ze mit ein sjoet duchtig gerete kriege, dae kwatsj hie ammaol. Sjoet det is ein groete sjoop of sjöp, dök van hout, veur kaore of weit mit op te sjöppe, meh ze waerde ouch in d'n törf gebroek. Zoe waert gezag van eine dae gans groete henj haet: dae haet sjoete van henj.

[OPLOSSING = C]

Bij A. Bie sjoetse heurt ein sjoets - gein sjoet. De Sterre der Zee waerde vreuger Sjoets-Mrie geneump. Of Jats-Mrie.
En waat B. betruf: eine kalkoen is ein sjroet, Duits Truthahn. En die whisky-shout is gans kwatsj: det is natuurlik grouse: korhoen.