Waor of neet waor (27)
dinsdag 12 06 2001
Auteur: Paul Prikken info@limburghuis.nl

A. [FOUT]
Sjroet det is poejer van solfer of salpeter. Vreuger, wie d'r nog gein lucifers of sjtekskes waore, heije de luuj ein 'tondeldoes'. Mit twie sjteinkes maakde ze vónke en daomit sjtoke ze de sjroet in brandj.

B. [FOUT]
De sjroet det zeen de bölkes in ein kartósj van ei jaagsgewaer. Mit fiene sjroet jage ze op petrieze en fezante, mer jeger gebroeke sóms ouch graove sjroet. Mit sjroet hoofs te neet zo good te mikke, want die fien bölkes vlege waal einen hauve maeter in het róndj.

C. [GOED]
Neet gesjaote is altied mis... mer ein sjroet det is ein kalkoen. Mie bepaold een vrouwelike kalkoen. Krismes is veur sjroete eine sjlechten tied. Den geit de sjroet mit ein völling in den aove.

[OPLOSSING = C]
De sjroet is ein kalkoen. Mie bepaold: ein vrouwelike kalkoen. Want v'r kènne in Limburg ouch eine sjroethaan, en det is het menke d'rvan. En ómdet minsje in het Limburgs ouch dèks en meistes mit bieste vergeleke waere, is het ouch ei sjeldjwoord. Auw sjroet det zèkge ze ouch veur ein auw vrouw.