Waor of neet waor
maandag 10 december 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Prachtig prachtig det de taalmeisters dit waord ins gevraog höbbe, den dao zien d'rs ummer twie van hie, van die oelesköp: de deskundige B en C. Det mót de loestereers noe waal klaor zien wie pómpwater. Eine oeles is einen hauve gewiepde, eine flares wurt ouch waal gezag - of uulskuke, meh oeles is nag enneuzeler.

Klink good: oeles B.

B. [FOUT]
Neum mich deskundige, gaer. Leef loestereers: wen A het neet wit, is het meis get oet 't boerelaeve of hae dink aan eine rare kaerel. Noe haet d'r - en det teikent de ÓNdeskundigheid van dae man: hie haet hae ei sjoen boerewaord, nieks zuut d'r. Want d'n oeles haet helaas weer mit de boerderie te make. Het is de ruumte baove d'n din, en det haet nieks mit foto's make te make, zoeväöl DIN, wo noe ASA gebroek wurt, nae: d'n din höb ich op ein basissjool heure umsjrieve es: het plein in de schuur. Allei: geliekvloers. Daobaove, wo meis hui loog, det is - of woor - d'n oeles.

C. [GOED]
Waat verzinne die men mich ammaol. Die twie kónne waal eine kop wie eine oeles höbbe, meh taalkundig bezej zit dao neet in. Eine oeles is eine sjteine pot, of depe sjaol - ja: wiene wurt ein sjaol pot? Anger probleem. Wen ich zèk sjteine pot, det hoot zoe, meh det woor geine oetgehaolde naamse sjtein, det zal dudelik zien, meh eine pot van aardewirk. In zoene pot - oeles dus - deej me vleisj van 't verke, vèt, zoermoos, of dök de milk wo bótter van gestoete waerde.

[OPLOSSING = C]

Taenge oeles waerde hiel vreuger ules gezag. Het waord kump veural in Midde-Limburg veur. Op anger plaatsje zègke ze Kölse pot - oet Kölle.