Waor of neet waor
vrijdag 10 08 2001
Auteur: Paul Prikken info@limburghuis.nl

Baljoene

A. [GOED]
Ich zouw het hie in de microfoon wille baljoene: loester neet nao die twie zeiveraers die achter mich kómme! En es deskundige B het nog eine kier riskeert óm dees oetzending mit ziene nónk Harie te bedèrve, dan waer ich raozetig kaod. Baljoene det beteikent hel kalle, raoze, böljere, tekiergaon.

B. [FOUT]
Wie Nónk Harie nog eine wuiles waor haet hae einen tied op het Klein Seminarie van Rolduc veur pestoer gelierd. Hae waor dao gaer gezeen bie de anger jónges die ouch veur pestoer sjtudeerde, want es emes get neudig heij den zörgde Harie d'rveur det het bènnekaom. "Kóns te mich ei pekske sigrette baljoene?", of, "Baljoen mich ins de PlayBoy!", vroagde ze dan aan Harie. En nónk Harie, dae dao de Kristelijke naastenliefde in de praktijk brach, dae zörgde d'rveur det het allemaol kaom. Mer ja, óndank is waerelds loen, ouch in Rolduc want de prefect haet Harie ins taengehaute aan de paort wie hae drie flesje sjnaps aan het baljoene waor. 't Waor op besjtèlling van die anger pestoers mer Harie woort waal weggesjik. Baljoene beteikent dus sjmókkele, bènnesjmókkele.

C. [FOUT]
Jao... en naodat Harie weg waor is het aantal insjrievinge op Rolduc zeker spektakulair verminderd. Sjeij toch oet! Diene Nónk Harie dae zal eine beechsjtool ouch neet dèks aan de bénnekantj gezeen höbbe. Angers zouw hae geweite höbbe waat baljoene waor. Gebaljoend waere, is zjwaor sjtraof kriege. De auw luuj weite det nog. Die keke vreuger altied in de kirk wae es beechvader in wèlke beechsjtool zoot. Bie ós waor het bekènd det de kaplaon leger penitenties oplag es de pestoer. Dao sjtóng ummer ein file veur dae beechsjtaol, wie op het sjpitsoer hie aan de Geuselt in Mesjtreech. Het waor dus zaak óm in de beechsjtool van de keplaon te gerake, want dae baljoende dich toch ei paar onzevaders en weesgegroetjes minder. Emes baljoene beteikent dus: emes sjtraof gaeve.

[OPLOSSING = A]
Baljoene beteikent böljere, hel kalle, tekier gaon. Het moot ein aud woord zeen, want het kump waarjienlik van 'baljuw'. De baljuw dae hauw vreuger de rechsjpraok in al die sjtreke die den weer aan einen hertog of keuning toebeheurde. En het ging d'r bie die rechsjpraok neet vruntjelik aan toe. Dae baljuw dae sjreeuwde, en dae sjòlj. Baljoene is dus hel kalle, raoze.