Waor of neet waor
donderdag 6 december 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Die oetdrökking kump oet d'n tied van vlak nao d'n Ierste Werreldoarlog, wie de wiks - sjoonpoets - ziemlich duur woor. Me zoog dan eine mit sjtevige sjoon - wirksjoon beveurbeeldj - meh mit kaal plekke, dus sjlech gepóts. Dan zól gezag zien: diek van laer, meh dun van sjmeer: dao zoot nieks op. In ei paar jaor waerde die oetdrökking angesj gebroek, in de beteikenis die ze noe nag haet: eine vent mit väl poeha, dae diek duit, mer eigelik nieks dao - sjtèlt wienig veur waat dae duit en zaet.

B. [GOED]
Prachtig gevónje - perfisiat. Me kan onnag aan de Hells Angels dinke: diek in 't laer meh neet väöl inne kop.

A. Laot ze det neet heure, die weite dich te vinje.

B. Helaas - knienehaas: die oetdrökking sjteit al in ein aaflevering van Veldekee oet 1902. En dae aorlog van dich woor van veerteen wies achteen - of neet?

Waat is het dan waal?

Gans einfach, en onnag sjiek Limburgs: ein vlaai mit eine dieke baom (bodem), en mit wienig sjpies d'rop.

C. [FOUT]
Tied veur te zèkge waat het waal is. De hiere A. en B. meine det sjmaer smeer is. Zól ich ouch zèkge wen ich ei verkierd antjwaord mós verzinne. Sjmaer is hie: sjlaeg, dink aan: ze gesjmaerd kriege, en noe is alles dudelik, num ich aan.
Neet? Allei: laer, det is hie: van leer trekken, diek van laer: ze flink oetgekafferd kriege, en dan löp het nag good aaf - dun van sjmaer: wienig sjtraof. Ich dink det de taalmeisters dit veur Sinterklaos gegaeve höbbe: dae kós zoegenaamp good giftig zien, en dan keem alles good.

[OPLOSSING: B].