Waor of neet waor
woensdag 5 december 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Sjrump höbbe. De vaste loestereers höbbe nao 150 oetzendinge al zoeväöl inzich in de taal det ze weite det det waord sjrump mit sjrómpe te make haet, wie klómp - klump, pómp - pumpke, neum mer op.
Sjrómp sjrómp sjrómp - det is ei Mesjtreechs vastelaovesleedje det ich es Vinlonier neet wil zinge. Geer wit waat det is: sjrómpe: was vrieve op eine wasroebel, meh ouch hel wirke. En eine dae zie laeve lank hel gewirk haet, dae haet meistes sjrump: hiel get geldj. Sjrump höbbe is dus geldj höbbe, en in Remunj hit det: sjräöm höbbe, meh det zól door de taalkundige verbaoje mótte waere. Het is sjrump.

B. [FOUT]
Och och. Hie kan ich noe ins gaaroet nieks mit. Doe woors zoe good in Ingels - dan witste waat shrimp is: garnale. Kiek nao zoen gepelde garnaal, die is krómp, die zuut zoeget oet wie dae wasroebel van dich wo op die Mesjtrreechtenere de gansen daag sjrómpe. Dink ouch ei bietje aan det Michelinmenke - en dan zuuste waat sjrump höbbe wörkelik is: ein krenkde, dan höbste euveral rumpels, op de erm, het diek van het bein, meh veural op de boek.

C. [GOED]
Ja - dao woor ich al bang veur: hae is d'r weer. Ummer vies krenkdes. Doe woors toch ouch dae van die hoon die häör ei neet d'roet kós kriege.

Theoretisch zól det kónne, ein hoon mit sjrump - sjrump det ze det dieker ei weer neet d'roet krieg. Sjrump höbbe is: engstig zien, bang zien veur. En noe bliek ouch 't versjil tösje die hampelemen en ein echte taalkundige. Zie weite ummer häöre kwatsj historisch te - ja: waat zal ich zèkge, inein te flatse. Meer neet. En ich, ich mót obbernuuj bekinne: gei good idee wo sjrump vandan kump.

[OPLOSSING = C]
Op de meiste plaatsje zaet me plaats sjrump höbbe: sjtrank höbbe veur. Det is Nederlands streng, wie in rögkesjtrank. Hie zit get van óntzag bie, waat sjrump neet haet.