Waor of neet waor
dinsdag 4 december 2001
Auteur: Wim Kuipers - wim.kuipers@hetnet.nl - tel. 043-325.23.22.

A. [FOUT]
Sjoen oetdrökking. Die móste veer kónne vernuje, den die kump oet 't boerelaeve van gans vreuger. Het is zoeget hetzelfde wie paerd die de sjtal ruke: die gaon get helder dan. Neet umdet ze nao de sjtal wille, mer dao kriege ze lekker aete. Det is hie hetzelfde. Dees oetdrökking waerde gebroek wen me tósje de middig, nao 't loeje van 't Angelus, op hoes aan góng veur te aete. Vreuger waerde sjmiddis werm gegaete, dan waerde op die groete häöf - hofsteden - oet enorm kaetele mit potlaepele van waal eine lieter opgesjöp - det is de sjöp - de schep die me ruuk.

B. [FOUT]
Waat eine zeiver. Ich zal ins oetlikge waat det beteikent. Iers det ruke: det mót me in verbandj bringe mit ónraod. Get ruke det me dink: dao is brandj, get is aan 't aanbranje in de käöke, en dere die ruke al rap ónraod.

Waat is hie daen ónraod?

Gans einfach: det me mót gao wirke, en det woor vreuger mit de sjöp. Veur eine manskaerel wore d'r twie dinger: liere en ei wit humme aan, of gaon wirke wie me zag, dus mit de kop wirke of mit de sjöp - mit de henj.

Dae ruuk de sjöp al waerde hiel dök gezag van jónges die op sjool neet mitkóste, ein veer, ein drei veur algebra, weer ein drei - det goof nieks meer, oetsjeie en mit nao de febrik, mit de sjöp wirke bie de gemeinte of op 't landje gaon wirke. Dae ruuk de sjöp al: hae hilt het neet lang mie vól op sjool.

C. [GOED]
Ach ja - eerlik wirk is prima, ouch al is 't mit de henj. Nae - wen dit euver dich gezag zól zien, det is hiel get erger dan ein drei veur algebra. Het beteikent detste het neet lang mie maaks - detste op dien lèste bein geis, doe ruuks de sjöp al, de sjöp van d'n dojegraever.

[OPLOSSING = C]