Waor of neet waor
donderdag 01 11 2001
Auteur: Paul Prikken

Taofeltrèk

A. [FOUT]
Ja het is jaomer dat v'r hie neet mit veer deskundige zitte in de plaatsj van mit drie. Ich mis eine veerde man óm mien levelingsbaezigheid te doon: det is kaarte. Ich sjpeel altied tóppe of petoete en neet zomer veur de knepkes. Ich sjpeel allein es er eine pot wurt gemaak dae de lètste wènner zich maog haute. Det is pas interessant: drie die verleze, en eine dae den taofeltrèk wunt. En det bèn ich meistal. Den taofeltrèk det is de ganse pot dae euverblif van het kaartsjpeel en dae geit nao de bèste sjpeler. Dat bèn ich, dus.

B. [GOED]
Foetele mit kaarte en foetele mit wäörd. Hae kèn het neet laote. Es te zoe'ne sjarletang aan taofel höbs zouws te bekans ei sjlaot op den taofeltrèk mote hange, want angers geit hae dich nog het bestek klauwe.
Den taofeltrèk det is de sjuuflaaj ónger het taofelblaad. En g'r moot ins kieke: g'r vèndj bekans gein taofel mier die zoe'nen henjige taofeltrèk haet. Dus noe moos te jedes keer opsjtaon es te ei mets of ei laepelke vergaete bès, want het bestek lik meistes in de kas. De luuj lagte det vreuger in den taofeltrèk. Ei good gedechs want dan höbs te al het gesjeer bie de handj.

C. [FOUT]
Geer höbt allebeij ei sjtök in de laaj. Zoe'nen óngeluifwaerdigen oetlèk, dao löp toch zeker geine loesteraer in! Den taofeltrèk det is toch sumpel: den toefeleuvertrèk. Het óngerlake det op taofel wurt gelag zodet dao gein kratse op kómme. Op de sjoen taofel in de bèste kamer loog altied einen taofeltrèk. De luuj waore zunig op hun sjpulle want zoe'n taofel die woort aangesjaf es ze trouwde en die moos gans hun laeve mit.

[OPLOSSING = B]
taufeltrèk = schuiflade van tafel